UVIÉU, 14 Mar. (EUROPA PRESS) -
La Xunta pola Defensa de la Llingua Asturiana (XDLA) va entamar una manifestación pola oficialidá'l sábadu 21 d'abril a les 12.00 hores n'Uviéu. La convocatoria va ser dos selmanes enantes de la del Día de les Lletres Asturianes "pa visibilizar meyor la reinvindicación de la oficialidá y posibilitar una afluencia mayor", señaló'l portavoz de la XDLA, Xosé Candel.
En declaraciones a Europa Press, Candel esplicó que la manifestación, que va salir de la Estación del Norte, surde depués de dellos alcuentros con estremaos sectores sociales de toa Asturies "énte los últimos y perfuertes ataques a la nuestra llingua y la so posible oficialidá". Asina, los convocantes quieren que la sociedá asturiana, "democrática y pacíficamente", muestre la so querencia y apoyu a la mesma.
Nel mes que queda enantes de la manifestación, la XDLA quier poner en marcha dellos actos pa visibilizar la marcha y buscar una afluencia mayor. Ente ellos, anuncien una gran campaña publicitaria, la posibilidá de que los conceyos aprueben mociones d'apoyu a la manifestación y la estrena d'un cantar y un videoclip que se va mover al traviés de les redes sociales.
Amás, d'equí al 21 d'abril, según anuncien dende la XDLA, van siguir manteniéndose alcuentros con entidaes y asociaciones "pa intentar armar un texíu social favorable y un clima positivu de cara a la mesma".
