El 'Cohousing' aterriza n'Asturies

La primer cooperativa de la rexón presenta'l so proyectu n'Uviéu

Autoxestión, ayuda mutua y cuidáu del entornu son los tres finxos nos que se basa'l 'Cohousing'. Comunidaes de viviendes onde se xunten privacidá col usu d'espacios comunes como comedor, llavandería o sales d'espardimientu.

Una docena de persones formen parte de la primer cooperativa de 'Cohousing' de la rexón y trabayen yá na creación d'un proyectu de 30 viviendes, de 50 metros cuadraos, que quieren construyir nos próximos años.

La bioconstrucción y la sostenibilidá ambiental son otros de los criterios d'estes comunidaes.

Güei n'Uviéu entamaron unes xornaes pa dar a conocer esti novedosu conceptu pal que busquen sofitu institucional.

El 'Cohousing' lleva años de desarrollu n'Europa, pero n'Asturies ye un conceptu entá verde, qu'estes terceres xornaes de 'Espacios de Vida Sostenible' quieren dar a conocer.